الحب والزواج في زمن الكورونا

من رسايل القراء ..

أما بعد..

س: زوجي كثير النقد .. هو بيحبني بس بينقدني وبيحبطني. ازاي اخللي نقده لي ميأثرش في علاقتي بيه؟

بصي يا ستي..

انتي لو سألتي سؤالك ده علي جروبات الماميز.. وصفحات الفيسبوك اللي اشهر مني مائة مرة.. هيقولولك.. انتي تستحقي احسن من كده.. انتي مَش أقل من مني زكي.

ولو سألتي سؤالك ده لرضوي الشربيني .. هتقولك انتي سترونج إندبندت وومن.. علقي جوزك في النجفة.. انتي مَش أقل من ياسمين صبري

ولو سألني اغلب اللايف كوتش او الدكاترة النفسيين.. ف يا اما هتطلقي.. يا اما هتاخدي أدوية للعلاج النفسي.. عشان دول ناس بيرفكت.. بيحبوا كل حاجة بالورقة والقلم.. وهم نفسهم بياخدوا أدوية عشان يبقوا بيرفكت علي طول.. وده عادي.. عاوزة تبقي بيرفكت وكويسة طول الوقت .. خدي دوا..

ولو سألتيني أنا.. فأنا بخاف من الفولورز بتوعي.. بيشتموني.. فآرائي بتميل للوسط واللين وأجرك علي الله وكده.. وبخاف اقول كلمة اخرب بيها بيت حد ..من الآخر

 انما لو عاوزة كلام الناس اللي عندها حكمة وشبه ناس زمان..اسمعي
ممكن اقولك الست العاقلة الراسية "ميشيل اوباما" بتقول ايه..

وخليني اقولك اشمعني ميشيل آوباما ..

عشان ست حقيقية مَنطتش علي نجاح حد..شقيت لحد م وصلت للي هي فيه.. حياتها مليانة طلعات ونزلات كبيرة وتغيرات جامدة.. وحتي لو لا قدر الله "ربنا يجعل كلامنا خفيف .. ربنا يبارك في زيجتها" انفصلت.. فهي عندها شئ من القناعة ان الحياة الزوجية لا ابيض بس ولا اسود بس
في لقائها الأخير مع أوبرا وينفري قالت بكل أريحية انها كانت بتروح لمستشار علاقات زوجية

كلامها واقعي.. مَش بلاستيك

كلامها ينفع يتطبق.. مَش بيعجز الناس ويحسسهم بالنقص

كلامها انا عملت كذا وانا زيي زيك.. انت كمان ينفع تعمل

وكلامي مَش قرآن..

انا بعرض لك وانتي اختاري اللي يريحك

ميشيل اوباما بتقول الناس اللي بتوصف الجواز بالوحش علي طول دول ناس ظالمة.. مَش بيقولوا الحاجات الكويسة.. الزواج الأصل فيه انه يستمر وكل المدة م تطول ، كل م بيبقي فيه مشاكل ..وقد تزيد.. طول المدة مَش معناه قلة المشاكل بحجة ان الأزواج خلاص فهموا بعض.. بالعكس احنا بنتغير ..ميشيل بتقول انا هدفي اعيش ٥٠ سِنة مع زوجي.. خلينا نقول ان عشر سنين من الخمسين سنة دول كانوا وحشين..عادي..

يعني العادي الطبيعي ، ان لا الزواج كله وحش، ولا كله سئ..

لو عاوزة تكملي.. تغاضي عن السئ وخليكي ممتنة للحلو.

في بردو شوية نقط، بصي لها كده وتأمليها...خلاصة كتب وتجارب ناس كتير قبلنا..ناس حلوة بنتعلم منها

أما اولا:

١- مَش كل النقد وحش.. ساعات النقد بيحط ايدك علي المشكلة.. تعرفي المشكلة وعالجيها .. ركزي في 

المشكلة .. مَش في النقد.

٢- شوفي حماتك أم زوجك كانت بتعمل ايه عشان تفهمه غلطه في شئ واعملي زيها أو متعمليش زيها 

حسب علاقة زوجك بأمه. الأزواج مختلفين..في زوج بييجي بالسياسة..وزوج تاني لأ..عشرتك معاه هي اللي  تاخدي بيها. اتعلمي من سابق غلطاتك وخليكي مرنة..حاولي وجربي تاني..علي الأقل هتتعلمي..هتبقي في ..مكان أحسن بعد كده..وعلاقتكم هتتحسن أو هتفضل زي ما هي أحسن ما تسوء.

 ..تواصلوا بالطريقة اللي بيفهمها..زوجك غير زوج فلانة

متاخديش بنصيحة مجردة..كل واحد غير التاني..اللي ينفعك مينفعش غيرك واللي ينفع غيرك ممكن مينفعكيش.

والصبر ضريبة أي حاجة عاوزة تستمري فيها (سواء شغل ، مشروع ،جواز، تربية، صداقة، درجة علمية)

٢- عشان متتأثريش سلبا بالنقد، خللي عندك حتة تملي بيها فراغك.. وتديكي احساس بالإنجاز ..وترفع معنوياتك سواء رياضة.. او هواية....او حرفة يدوية ..أو علوم دينية أو علوم دنيوية ونميها .. ده لو مبتشتغليش  .. لو بتشتغلي.. إدرسي اكتر.. طوري نفسك في شغلك...او حافظي علي هواياتك اللي بتحبيها وجربي جديد..

٣- زي م بتاكلي تغذي جسمك.. غذي روحك وغذي عقلك.. كل فترة اسمعي درس ديني او حد ملهم يزقك لقدام او فيلم او مسلسل بيضحكك.. مارسي السعادة.. غيري مودك بنفسك.. متتفرجيش علي مسلسلات تكئبك وتعيطك وتنكد عليكي.

٤-اتطوعي.. اعملي نشاط خيري..مرة في الشهر حتي.. مَش لازم جمعية خيرية .. ممكن تعملي اكل لصاحبتك..او تزوري حد قريبك او تقضيله خدمة.. ده تطوع بردو".

"عشان لما الشيطان يدخل مخك ويقولك انك معملتيش حاجة لنفسك او لاخرتك وكله لبيتك وولادك.. تفتكري الحاجات دي وتبقي راضية عن نفسك"

٥- حافظي علي نص ساعة لنفسك او ساعة في اليوم..اي وقت تحبيه..تبقي بتاعتك انتي..تتمشي..تتزوقي..تتنططي..تقري..في ناس بتعملها الصبح وناس بتعملها بعد الولاد م يناموا...قدري ذاتك..انتي بتعلمي الناس تعاملك ازاي بطريقة تعاملك مع نفسك..لو مبتقدريش نفسك، محدش هيشتريلك تقدير من البقال.

٥-حطي دايما في مخك حاجة مهمة اًوي لماً الأمور تتعقد مع اًي شخص عاوزه تحافظي علي علاقتك بيه..

رددي الجملة دي.. علي الاقل بيعمل كذا .. علي الاقل هو كذا"

بصي للكويس وداري بيه علي الوحش ."انما البيوت تبني بصبر النساء"

٦-كلنا بني ادمين مليانين عيوب.. محدش كامل.. اوعي حد يضحك عليكي ويقولك ان في حياة كاملة والمفروض الست متشتكيش..

وكلام زي "انتي مَش اقل من كذا .. وانت تستاهلي كذا...والمفروض الراجل يعمل كذا ويجيب كذا ويقول كذا .."

مفيش حياة كاملة، ومفيش حد كامل، ومفيش بيت مفيهوش مشاكل ومفيش أزواج مبتختلفش ويبقوا علي نغمة واحدة.. طول العمر

الحذر كل الحذر من العلاقات الهادية شكلا.. والزواج اللي مفيهوش مشاكل.. عشان فيه خرس زوجي وفيه نفور .. فيه شكل اجتماعي.. لكن مفيهوش حياة.

٧- ملكيش دعوة ببهرجة الصور علي الإنستغرام والفيسبوك.. متلمعيش اللي يبان للناس.. لمعي جواكي.. لمعي جوه.. بره مشً مهم..

" " ولا تمدن عينيك إلى ما متعنا به أزواجا منهم زهرة الحياة الدنيا لنفتنهم فيه ورزق ربك خير وأبقى "

٨-المليونير احمد ابوهشيمة قادر يجيب لزوجته طباخ بدل م يوديها المطعم، ياتري لو لا قدر الله زوجته تعبت .. هيصورها وهي عيانة ويجيبلنا صورة الدكتور وهو بيداويها ويحطهالنا عالفيسبوك بردو.. ولا ايه النظام؟

ودي أسوأ حاجة في السوشال ميديا.. انها خلت الواحد سهل يشوف ناس عندها

Standards

غير بتاعتنا وبيفرضوها علينا..بالإكراه

أخيرا بقي..

مَش معني اني بكتب كلام كويس ومترتب يبقي أنا شخص مثالي..

انا صاحبة قلم ولي دور

وانا بكتب اللي نفسي اشوفه

ونفسي اسمعه.

مبيعجبنيش كلام المشاهير واصحاب البرامج كله ضلال وتقويم وخراب ونفسنة وصور مَش صحية بتطلع ناس مريضة بتبص لغيرها أو بتحكم علي غيرها وتخرب بيوت الناس بدعوي الإصلاح ..

أهالينا وناس زمان كده وبيوتهم كانت كده وده اللي شفناه منهم واتعلمناه عنهم.

أحنا في أيام الكورونا ..أيام صعبة..بس نفتكر

  

(ما خالط الرفق شيئا إلا زانه)

صدق رسول الله صلي الله عليه وسلم

الكتابة فن.. واصحاب الأقلام بيكتبوا الواقع اللي عاوزين يشوفوه او بيكتبوا ضد الواقع اللي عاوزين يغيروه.

لازم يبقي فيه اقلام مضادة للخراب

وأقلام مضادة للنفسنة

وأقلام مضادة للتحرش

وأقلام مضادة للعنف والبلطجة

وأقلام مضادة للظلم

وأقلام مضادة للاكتئاب والنكد.

(النصح أرخص ما باع الرجال فلا تردد علي ناصح نصح ولا تلم)

الأصمعي 

كتبي علي موقع أمازونرابط الكتب

 مقالاتي ومدونتي علي عربي بوست 

رابط مدونتي بالانجليزية

ده الهاشتاج الجديد 

#بفكركم_وبس