قلم العمر! قصة قصيرة

 

قلم العمر

قصة قصيرة

#حواديتي

روايات كاملة

Photo credit: Archan Nair

بنتي اتضايقت اوي لما عرفت اني هضطر ارجع تاني للشغل القديم، بس نعمل ايه ما باليد حيلة..

غير ان صحتي مش مستحملة الشغلة دي، والخدمة في البيوت دي شغلانة حلال اه بس الناس تحترمها لأ..

بس صباح علي وش جواز ومحتاجة حاجات ياما، وأمي عمرها م هتديني حاجة..

جنب شغلتي في المستوصف ، و بدل م استني حسنة من ده، ولقمة من دي.. أنا بعتبرها..  خدمة قصاد خدمة.. 

مش حسنة من حد، هي الناس فاكرة ايه

م الفقير بردو له كرامة وبيحس..

دخلت بيوت ناس ياما...

أحسن ناس اشتغل عندهم اللي يكرمني ويديني بقشيش كويس ويعاملني كويس ...

مرة كنت شغالة عند ناس، واذان المغرب أذن علي وكنت صايمة، بنت صاحبة البيت حلفت علي لازم افطر معاهم ومن نفس اللي بياكلوه.. والله عيني دمعت ومكنتش عاوزة اخد أجرة...

اوحش ناس اشتغلت عندهم هم الناس اللي يفتكروني بحسدهم،

المحروم مبيحسدش، المحروم  اللي زي حالاتي نفسه عزيزة 

ومن جواه عارف انه احسن من اللي بيعطي له..

عمري م حسّيت ان حد احسن مني في حاجة، ولا عمري بصيت للي ف ايد حد..

اللي بيحسد ده ناقص من جواه وممكن يبقي معاه بس الحسد ده داء في القلب بيخلليه مستكتر علي غيره ، ولا عمره عاجبه حاله..

ملهاش دعوة بالغني والفقر

..نهايته

..كل واحد بقي ونيته

والله برتاح لما بدعي الدعوة دي... ربنا يدي كل واحد علي اد نيته.. 

كان في دكتور ابن حلال كده، اسمه دكتور عمر الطيب، طيب وهو طيب ...اهله ناس مريشة، وكان دائما يجيب لي شغل ف بيوت ناس شيك قرايبه ومعارفه.. ناس كده لارج كده زي اللي بيطلعوا ف التلفزيون دول .. بيحطوا مكياج كده ويلبسوا افرنجي..

، كانوا بيهدوني صحيح، بيوتهم كبيرة، وطلباتهم كتيرة

وفِي منهم اللي غني بس   يفاصل في التعريفة ... اللي هو خلاص يا عّم .. خد الفكة يمكن دول اللي يزيدوك غني...

انا فاكرة مرة دكتور عمر ده وداني عند واحدة قريبته ، طلبت مني افك الستاير وانضف جوه ماسورة الستارة!

ماسورة  الستارة ايه اللي عاوزاني انضفها!!

مصدقت خدت أجرتي وفكيت...

بس علي فكرة مش كل الناس المبسوطة الشيك زي الست بتاع الستاير كده، بالعكس..

اللي علمتني الشغلانة اصلا واحدة ست شيك كده زيهم، 

كانت اول حظي ..

وكنت من خيبتي فاكرة كل الناس زيها...

اول م رحت قالت لي بصي انا هدخل اريح شوية، خلصي اللي تقدري عليه ولما اصحي اكمل..

استغربتها هي ازاي كده بسيطة، ومتواضعة، مش بتاعة امارة وهاتي وحطي وجيبي..

لما صحيت، لقيتها عادت علي كل اللي عملته، ومبهدلتنيش ولا خصمت لي، ولا اتبلت علي اني سرقت حاجة، ولا كلت علي حقي... وخللت كل حاجة الحنفيات والاحواض والبانيو، 

حتي ترابزين الفيللا بتاعتها بتبرق، 

وبقت وهي بتعمل تقوللي بتعمل ايه.. الله يمسيها بالخير سافرت  بلد بعيد اوي بايني اسمها كنكة، ولا كنبه، أنا ايش عرفني..

مرة ساعة الشفت المسائي قعدت مع الدكتور ده وعملت له كوباية شاي، كانت العيادة رايقة، وهو كان مشغل أغنية الست.. أخد مني كوباية الشاي وقالي تسلم ايدك يا أم صباح.. كوباية الشاي بتاعتك دي هي اللي بتظبط دماغي طول اليوم...

قلت له: انا عاملة قراقيش.. خد دوق..

قالي تسلم ايديك، انتي ليه متتكلميش عّم حامد بتاع الكنتين يخلليكي تبيعي القراقيش دي ..

قلت له: عّم حامد ده لا بيحب يعمل حاجة لحد ولا يحب لحد الخير.. في ناس كده .. تحب تقف زي العمود في النص كده.. لا تاخد ولا تدي..ولا عمره يضحك ف وش حد ابدا  الله يسهله ببوزه اللي عامل زي الحنفية، مرة يمين ع الساقع ومرة شمال ع السخن..

دكتور عمر ضحك اوي ، قالي انتي طيبة يا ام صباح، ابقي افتحي الدرج اللي تحت جهاز ال سي بي سي.. انا سايب امانة لصباح.. ربنا يتمم بخير!

قعدت ادعيله من قلبي ، دعيت له كتير والله كانه بدعي لابني ، والله احسن من ابني كمان

في ناس كده مبيبقاش في بينك وبينهم دم، لكن ربنا عملهم كده احسن من اللي من دمك..

قلت له : ربنا يعليك ويزيدك، ويرزقك ببنت الحلال اللي تستاهلك والله ده انت ابن حلال ..مصفي

اتنهد كده و سكت شوية... حسّيت ان زي م اكون دست له ع الجرح ، وحسيت اني كسفته بدعوتي.. 

قلت اما احاول ألطف الجو شوية... قلت له اصل يا دكتور عمر انت اللي هتتجوزها دي، لازم ولابد تبقي جميلة كده زي حضرتك...

انت مينفعش تاخد واحدة اي كلام ابدا!

ابتسم كده وحط وشه في الارض شوية، وبعدين شرب شفطة من كوباية الشاي وبص ع النتيجة اللي متعلقة وسرح دقيقة 

وبعدين قالي..

عارفة مرة سألوا السؤال ده لكمال الشناوي الممثل: ليه بمتتجوزش لحد دلوقتي؟

قال: لا الجميلات بترضي بي ، ولا أنا أرضي باللي مش جميلات 

شهقت كده وقلت له: وهم يطولوا، في حد مبيرضاش بكمال الشناوي بجلالة قدره؟

قال لي: اه فيه ستات مترضاش بحد وسيم ومشهور..زمان كده كنت قريت حكاية في بريد الجمعة ف جورنال الاهرام كان بيحكي ان حد من القرّاء باعت له حكايته، بيقول انه كان وسيم الطلة، كل الستات كانت بتجري وراه، كان مغامراته كتير ، ولما قال يا جواز قالوا بس ده هيتجوز ملكة جمال، بس كانت صدمة  انه ولما جه يتجوز اتجوز واحدة دميمة، يعني حتي مش عادية ولا حتي متوسطة الجمال...كل الناس كانت فاكرة انه عشان وسيم هيتجوز واحدة جميلة، بس هي الدميمة دي اللي جرته وراها وخللته يتجوزها ومكانتش راضية بيه كمان، قالت له انت وسيم زيادة عن اللزوم ومشاكلك  هتبقي كتير .. وهي مش عاوزة وجع دماغ، وهو كان واخد علي اعجاب الستات بيه، اهمالها ليه شده... فضل يلح لحد م رضيت، وهي رضيت عشان هي دميمة ومفيش غيره اتقدم لها...

صحيح اللي يعيش في الدنيا دي يا ما يشوف

وبعدين قلت أصلح اللي قلته...

قلت له يقطعني مقصدش، 

لو سيرة الجواز دي بتضايقك.. انت اصلك ابن حلال مصفي وابن ناس كده وبتاع ربنا، انا بس مستغربة يعني مش عاجبك حد؟ ليه متجوزتش لحد دلوقتي؟

قاللي: سيرة الجواز نفسها مبتضايقنيش.. 

قام من مكانه وقام حط شوية ورق ف الدرج جنب الملف الاصفر بتاع العيانين... 

ندمت اني فتحت الموضوع تاني، هو انا نسيت نفسي، قمت اعدل الكرسي وقلت اطلع المقشة اكنس بره العيادة...

وانا بمد ايدي ورا دولاب الدفاتر والكيماويات ... لقيته بيكمل كلامه عادي...

قال:

انا اول م اتخرجت من عشرين سنة، كنت وارث مبلغ كويس ومع شغلي حوشت مبلغ محترم، اخويا الصغير كان بيفكر يهاجر، وكان محتاج فلوس، سلفته كل اللي معايا وقالي هيرد لما يقف علي رجله..

هاجر، وبعد م اموره استقرت قالي بح..

اخد تحويشة عمري بعد م بعت  كل اللي معايا حتي شقتي اللي عايش فيها ..

اخد كل اللي حيلتي..

انا الجواز بالنسبة لي رفاهية، عشان اتجوز واحدة من مستوايا ومستوي عيلتي عمرها م هترضي بامكانياتي ...أنا أخدت أكبر قلم في حياتي من أقرب الناس لي... أنا أخدت قلم العمر....